Vijon përkeqësimi i situatës te “Arrat e Gurrës” në aksin kombëtar Librazhd – Prrenjas. Pritet raporti nga shërbimi gjeologjik

Rruga Librazhd-Pogradec vazhdon të mbetet e bllokuar, teksa situata është përkeqësuar në zonën e e quajtur “Arrat e Gurrës”, ku vijojnë rrëshqitjet e tokës.

Mësohet se pritet një relacion nga Shërbimi Gjeologjik, në mënyrë që të nisë ndërhyrja.

Një nga alternativat është ndërtimi i një rruge provizore paralel me hekurudhën. Së shpejti do të mblidhet Këshilli Teknik.

Ura ka degraduar plotësisht, asfalti është çarë dhe duket se është i pariparueshëm. Po kështu, ka ndaluar puna për hapjen e by-pass provizor në anën e sipërme të rrugës ekzistuese, pasi jeta e punëtorëve ishte në rrezik.

ARRSH deklaron se rrëshqitja është fenomen natyror shkaktuar nga shiu, por prokuroria ka dyshime se mund të jetë abuzuar nga kompanitë që po ndërtojnë korridorin e VIII. Prej se dielës kanë nisur hetimet për veprat penale “Shpërdorim i detyrës”, “Shkelje e barazisë në tenderë apo ankande publike”, “Shkatërrimi i rrugës”, “Ndotja e ajrit, ujit apo tokës”.

Lotin e shtatë të autostradës e ka fituar kompania “ANK”, kantieri i se cilës ndodhet 2 km larg vendit ku u shemb rruga ekzistuese. Po kjo kompani, në pronësi të Agim Kolës, u pa këto ditë në terren, e kontraktuar nga ARRSH-ja për hapjen e bypass-it provizor.

Qytetarët e Korçës, Pogradecit, Përrenjasit e Librazhdit për të ardhur në Tiranë duhet të lëvizin në rrugën Maliq – Gramsh, e cila jo vetëm zgjat distancën por nuk ofron siguri. Një alternative tjetër por më e mundimshme është nga Tepelena e Leskoviku. Ndërsa maunet e Maqedonisë së Veriut lëvizin nga Rruga e Arbrit.