Vuçiç ankohet pas vendimit të Speciales: Nuk janë dënuar për krime kundër njerëzimit

Presidenti i Serbisë, Aleksandar Vuçiç, ka reaguar pas vendimit të Dhomave të Specializuara të Kosovës në Hagë ndaj ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi.

Në një konferencë për media, Vuçiç deklaroi se Serbia duhet të vazhdojë të ruajë paqen dhe stabilitetin, ndërsa përballja me të kaluarën, sipas tij, duhet të bëhet përmes dialogut.

Duke komentuar aktgjykimin, presidenti serb kritikoi mënyrën se si, sipas tij, janë trajtuar disa prej akuzave dhe krimeve të pretenduara ndaj serbëve.

Vuçiç theksoi se katër ish-drejtuesit e UÇK-së janë dënuar gjithsej me 81 vjet burgim, por pretendoi se në vendim nuk janë përfshirë disa akuza që, sipas tij, lidhen me krime kundër njerëzimit.

“E gjithë kjo nuk u mor parasysh dhe, siç thashë, këto gjashtë akuza, të cilat kanë të bëjnë me krimet më të rënda kundër njerëzimit, nuk u shpallën fajtorë”, tha Vuçiç.

Ai shtoi se, përballë këtij zhvillimi, Serbia nuk ka arsye “të jetë e lumtur ose e trishtuar”, duke e lidhur qëndrimin e tij me nevojën për ruajtjen e paqes dhe stabilitetit në rajon.