Xhelil Gjoni: Hysni Kapon mund ta kenë eliminuar

Prej disa ditësh në media shkruhet për vdekjen e Hysni Kapos. Sot është ish-sekretari i Parë i PPSH-së për Tiranën dhe kunat i familjes Kapo, Xhelil Gjoni, që ka folur për vdekjen e tij. Ai thotë se ka dyshime që Hysni Kapo është eleminuar.

“Nëse do të sjell në vëmendje një deklaratë të Nesti Nases, do që thosha se nuk përjashtohet dhe eliminimi i tij. Në gjyqit kundër Kadri Hazbiut, ish-ministri i Jashtëm, Nesti Nase tha se Andropovi, kreu i KGB-së dhe ministër i Brendshëm i Bashkimit Sovjetik i ishte shprehur se rruga për të eliminuar Enver Hoxhën ishte duke eliminur Hysni Kapon. Nestin nuk e detyroi kush ta thoshte këtë deklaratë në gjyqin që i bëhej atij”, thotë ai për “Panorama”.

Ndërsa i pyetur nëse mendon se mjekët francezë kanë qenë të kompromentuar nga agjenturat, Gjoni thotë: “Herën e dytë, shoku Enver dërgoi Ramiz Alinë në Paris që të qëndronte pranë Hysni Kapos. Por rezultoi se Ramizi mori vajzën e tij dhe nuk u mor fare me Hysniun. Por di që Hysniu nuk e afroi fare, i qëndroi ftohtë. Gjithashtu Hysniun e shoqëronte edhe Llambi Ziçishti. Hysniu kishte kërkuar që të operohej në Shqipëri me Petri Gaçen, por mjekët francezë këmbëngulën që ai të shkonte në Paris. Madje Petrit Gaçen e nxorën jashtë operacionit në Paris. Nuk të thonë gjë këto fakte ty?”.

Ndërsa ish-mjeku personal, Dine Abazi thotë se ai ishte i sëmurë nga zemra dhe nga diabeti. Sipas tij, kanceri në pankreas ndërkohë iu shfaq papritur.