Partia Demokratike ka publikuar listën e kandidatëve për anëtarë të Këshillit Kombëtar, forumit më të lartë vendimmarrës të saj mes dy kuvendeve.
Mes kandidatëve spikasin emra të njohur të demokratëve me kontribute ndër vite në parti dhe në jetën parlamentare. Në garë janë ish-deputetja Dhurata Çupi, si dhe ish-ligjvënës të tjerë të PD-së, mes tyre Genc Pollo, Ardian Turku, Bedri Hoxha, Asllan Dogjani, Aurel Bylykbashi, Gjok Vuksani, Petrit Doda, Roland Keta dhe Adriana Gjonaj.
Në listën e kandidatëve bie në sy edhe emri i reperit Arkimed Lushaj, i njohur me emrin artistik Stresi. Ndërkohë, edhe avokati Jordan Daci kandidon për një vend në Këshillin Kombëtar.
Po ashtu, në garë është edhe Juela Meçani, e cila synon të bëhet pjesë e forumit drejtues të demokratëve.
Nga radhët e Forumit Rinor të Partisë Demokratike (FRPD) kandidojnë edhe Glauk Olldashi dhe Azem Hajdari. Sipas rregullave të përfaqësimit, Forumi i Gruas dhe Forumi Rinor do të kenë kuota të veçanta në përbërjen e re të Këshillit Kombëtar të Partisë Demokratike.
