Një zjarr i madh pyjor ka përfshirë gadishullin e Halkidikit në Greqi, duke kërcënuar plazhet dhe vendpushimet e mbushura me turistë verorë, çka ka çuar në evakuimin e qindra njerëzve. Shërbimi zjarrfikës njoftoi se avionë dhe helikopterë për shuarjen e zjarrit nga ajri, së bashku me afro 150 zjarrfikës, po luftonin flakët që po përhapeshin me shpejtësi në jug të qytetit të Selanikut. Dy zjarrfikës të plagosur u dërguan në spital.
Brenda pak orësh nga shpërthimi, zjarri iu afrua shtëpive rreth vendpushimeve të njohura të Sivirit dhe Fourkës, të cilat janë plot me turistë. Agjencia greke e mbrojtjes civile dërgoi paralajmërime evakuimi me telefon për banorët dhe pushuesit në këto dy zona. Më shumë se 250 turistë, shumë prej të cilëve mbanin fëmijë në krahë dhe ishin me kostume banje, u evakuuan nga deti me 15 varka të vogla të vëna në shërbim për emergjencën, raportoi televizioni publik ERT. Një zëdhënës i shërbimit zjarrfikës theksoi se evakuimi nga deti ishte i domosdoshëm pasi flakët po i afroheshin plazheve.
Pamjet e transmetuara nga ERT tregonin dhjetëra njerëz në radhë në një ponton në Fourka, duke pritur të largoheshin ndërsa tymi mbulonte qiellin mbi vendpushimet. Gjithashtu, kishte bllokime trafiku me makina që përpiqeshin të largoheshin nga Fourka dhe Siviri. ERT raportoi se një mur flakësh tre kilometra i gjatë dhe deri në 30 metra i lartë po i afrohej vendpushimeve. Një pronare shtëpie në rajon, e identifikuar si Sophia, i tha AFP-së se flakët kishin arritur qytetin dhe shtëpitë. Zjarrfikësit theksuan se erërat e forta e bënin betejën kundër zjarrit jashtëzakonisht të vështirë.
Autoritetet greke kishin lëshuar një alarm maksimal të nivelit pesë për zjarret në pjesën më të madhe të Greqisë kontinentale, ndërsa autoritetet e Halkidikit kishin ndaluar hyrjen e publikut në pyjet me pisha të rajonit, të cilat janë shumë të ndezshme. Parashikuesit e motit kishin paralajmëruar erëra deri në 100 kilometra në orë për ditën e premte. Greqia goditet rëndë nga zjarret pyjore çdo vit, dhe ekspertët thonë se rreziku po rritet për shkak të ndryshimeve klimatike të shkaktuara nga njeriu, të cilat kanë bërë thatësirat dhe fenomenet e tjera të motit më ekstreme.
Autoritetet bënë të ditur se 40 zjarre pyjore u raportuan në të gjithë Greqinë brenda 24 orësh, dhe nëntë prej tyre ishin ende jashtë kontrollit deri të enjten vonë. Vetëm këtë muaj, dy anëtarë të ekuipazhit të një helikopteri që ndihmonte në shuarjen e një zjarri pyjor pranë Athinës humbën jetën kur avioni i tyre u përplas me një helikopter tjetër në ajër. Ai zjarr shkatërroi 110 kilometra katrorë pyll.
Marrë nga France 24 Live News