Zvicra, mesatarja e pasurisë: 567 mijë dolarë për frymë

Zviceranët vazhdojnë të posedojnë më së shumti pasuri për  njeri, në gjithë botën. Me 567 mijë dollarë (ose 545.000 franga) ata janë të parët me një distancë të madhe me shtetasit e Zelandës të cilët posedojnë nga 400 mijë dollarë për banorë.

Sipas një studimi të realizuar nga Global Wealth Report (pjesë e Credit Suisse), nga viti 2000 e deri sot pasuria mesatare e zviceranëve është rritur për 144 për qind. Por pjesa më e madhe e kësaj rritjeje i referohet forcimit të frangut ndaj dollarit, konstaton studimi.

Si kriter për vlerësimin pasurisë, studimi në fjalë ka marrë të gjitha investimet e kapitalit ashtu si dhe gjërat me vlerë dhe patundshmëritë në dispozicion. Ndërsa borxhet janë hequr nga kjo shumë dhe fondet private të sigurimit janë përfshirë po ashtu ndërkohë që fondi pensionist shtetëror përjashtohet nga llogaritja.

Mirëpo mesatarja e përmendur fsheh brenda vetes pabarazinë reale që ekziston në ndarjen e pasurisë në Zvicër. Kjo për faktin se pasuria e madhe e një numri të vogël është ajo që e rrit mesataren e përgjithshme.

Madje në Zvicër, ndryshe nga ajo që ka ndodhur në një numër vendesh, nuk ka pasur ngushtim të jazit në mes të të pasurve dhe të varfërve. Kështu, nga mesi i vitit 2014 deri në mesin e vitit 2015 në Zvicër jetonin 3800 persona me pasuri më të madhe se 50 milionë dollarë secili.

Ndërsa 1500 prej tyre madje kishin më shumë se nga 100 milionë dollarë.