4 vite në luftë për jetën, vdes gazetari shqiptar

Magazinë E Premte, 11 Shtator 2020 19:43

Ka ndërruar jetë ditën e sotme gazetari shqiptar, Sulejman Gashi.

Ky i fundit vuante nga një sëmundje e rëndë, betejë me të cilën nuk mundi ta fitonte.

Njoftimin e kobshëm e ka dhënë vetë familja Gashi përmes një postimi në rrjetet sociale.

Njoftimi i plotë i familjes:

“Të dashur familjarë dhe miq, me píkëllim të thellë ju njoftojmë që sot, me 11 shtator 2020, ndërroi jetë më i dashuri ynë z. Sulejman Gashi. Ai po luftonte shumë që të rikthehej nga gjendja e rëndë që kishte pësuar katër vite më parë.

Varrimi i të ndjerit do të bëhët në vëndlindjen e tij në Kosovë, vendin të cilin ai e deshi aq shumë. Sulejman Gashi bëri një jetë, dhe la një vepër, me domëthënie të jashtëzakonshme për familjen, profesionin, vendin dhe kombin e tij.

Në ditët në vijim do të ju japim informata të mëtutjeshme. Ne jemi mirënjohës për respektin dhe dashurinë që njerëzit e kanë për më të dashurin tonë, Sulejmanin, por ju lusim që bashkërisht të respektojmë masat e shëndetit publik në këtë kohë pandemie.

Ju jemi mirënjohës për respektimin e privatësisë sonë në këtë kohë tejët të vështirë për familjen dhe farefisin tonë. Me respekt, Familja e z. Sulejman Gashi”.

4 vite më parë, korrespodenti i RTK-së në SHBA, Sulejman Gashi pësoi një atak kardiak gjatë një udhëtimi pune në qytetin Salt Lake City në Utah.

Ai le pas bashkëshorten Tonja me fëmijët, Sarandën, Drilonin, Janinën dhe Egzonin.