Analisti Fareed Zakaria, së shpejti në Shqipëri

Analisti amerikan Fareed Zakaria, një nga mbrojtësit më të fortë të arsimit liberal, pra të rëndësisë që kanë shkencat humane në formimin e njeriut, do të botohet së shpejti në shqip nga UET-Press dhe do të jetë i ftuar nga UET për një leksion të hapur me studentët.

Zakaria e përkufizon bindshëm nevojën e edukimit në humanitete përpos edukimit teknik me një analizë të botuar këtë vit në Washington Post.

“Arsyeja finale e vlerës së paçmueshme të edukimit liberal gjendet në fillesat e tij. Për shumicën e historisë njerëzore, gjithë edukimi ishte i bazuar tek aftësitë teknike. Gjuetarët, fermerët dhe luftëtarët i mësonin pasardhësit e tyre të gjuanin, të punonin tokën dhe të luftonin. Por 2500 vite më parë, kjo gjë ndryshoi në Greqinë e Lashtë. Filloi të eksperimentohej forma e re e qeverisjes: demokracia. Kjo risi në qeverisje kërkonte risi në edukim dhe në koncepte. Aftësitë bazë për të kultivuar ushqim dhe për të ndërtuar vegla nuk ishin më të mjaftueshme. Qytetarët u vunë përballë sfidës për të menaxhuar trupin shoqëror dhe për të praktikuar vetëqeverisjen. Ata ende vazhdojnë ta bëjnë”, shkruan ai.