“Coca Cola” eksperimenton me pije alkoolike

“Coca Cola” po planifikon të prodhojë një pije alkoolike, për të parën herë në historinë 125-vjeçare të kompanisë, me një produkt të tipit “alcopop” në Japoni.

Ajo synon të rrisë fitimet në vend, si pasojë e shijes që po zgjerohet gjithnjë e më shumë për “Chu-Hi”, një pije e gazuar me shije, e kombinuar me një pije alkoolike lokale të quajtur “shochu”. Produkti ka zakonisht 3 deri në 8 për qind alkool.

”Nuk kishim eksperimentuar më parë në kategorinë e pijeve alkoolike, por ky është një shembull sesi ne vazhdojmë të eksplorojmë mundësitë e shumta”, tha Jorge Garduno, president i “Coca Cola” në Japoni. Sipas tij, ka pak gjasa që pija të shitet jashtë Japonisë.

Fjala “alcopop” i referohet zakonisht pijeve të ëmbla, por alkoolike, që në vitet ’90 u bënë shumë popullore pavarësisht kritikave, sipas të cilave ato inkurajonin të rinjtë për të konsumuar alkool në sasi të mëdha.