Fototeka “Marubi” workshop për restaurimin dhe konservimin e materialeve fotografike

Magazinë E Diel, 18 Prill 2021 00:14

Nga data 22 deri 26 qershor 2015 në Fototekën Kombëtare “Marubi” për të parën herë do të organizohet një workshop për restaurimin dhe konservimin e materialeve fotografike.

Ky workshop organizohet në bashkëpunim me Ministrinë e Kulturës së Republikës së Shqipërisë dhe Ambasadën e Francës në Shqipëri në kuadrin e mësimdhënies për nxënësit restauratorë të specialitetit “Fotografi” të Institutit Kombëtar të Trashëgimisë në Francë (Institut National du Patrimoine).

Ky workshop ka si qëllim të perfeksionojë metodologjinë e kantierit të koleksioneve dhe të realizojë disa ndërhyrje të nevojshme në restaurimin dhe konservimin parandalues të një pjese të materialeve fotografike të Fototekës Kombëtare “Marubi” në Shkodër.

Ekipi i ekspertëve që do të organizojë workshopin do të drejtohet nga një prej emrave më të njohur të fushës së restaurimit të fotografisë, Drejtoresha e Restaurimit dhe Konservimit të Fotografisë për Francën, znj. Anne Cartier-Bresson, bija e fotografit me fame botërore Henri Cartier-Bresson, e shoqëruar nga dy studentët Lionel Reis dhe Morgane Volaric.

Ky bashkëpunim vjen si rezultat i njohjes nga afër me vlerat e Fototekës Kombëtare “Marubi” nga Drejtorit i Përgjithshëm i Institutit të Trashëgimisë për Francën, Roch Payet. Organizimi i këtij workshopi është menduar që të vazhdojë edhe në vitin që vjen, kohë kur Fototeka Kombëtare “Marubi” do të ketë edhe muzeun e saj të ri.