KAZAN FEST, aktiviteti i veçantë i traditës dhe artit në Këlcyrë

Bashkia e Këlcyrës ka zgjedhur një mënyrë të veçantë për të promovuar turizmin dhe prodhimet vendase në këtë zonë.

Në datat 4-5 tetor në fshatin Ballaban do të zhvillohet KAZAN FEST, një projekt që gërsheton traditën e prodhimeve e kulinarisë së zonës me aktivitetet artistike. Festa e veçantë zhvillohet në Fermën Grand Albanik dhe organizohet nga Qendra ISO, në bashkëpunim me Bashkinë e Këlcyrës.

Pjesëmarrësit kanë mundësi të shijojnë produktet njohura të zonës; verë, reçelra, djathë e kos të prodhuar në mënyrë artizanale nga fermerë dhe prodhues të Këlcyrës, Përmetit, Gjirokastrës, Tepelenës, Libohovës, Dropullit dhe Memaliajt.

Ndërsa aktiviteti artistik do të drejtohet nga Boiken Lako dhe grupe të reja të muzikës pop, rock, RnB, dhe DJ. Pjesë e koncertit do të jenë dhe grupi i Sazeve të Këlcyrës.