Kursi i këmbimit/ Leku u zhvlerësua lehtë në tremujorin e fundit 2019

Leku u zhvlerësua lehtë kundrejt euros në tremujorin e fundit të vitit të kaluar, pas një serie të gjatë mbiçmimi të regjistruar në vitet e fundit. Sipas Bankës së Shqipërisë, kursi i euros rezultoi mesatarisht 122.7 lekë, me një nënçmim të lekut prej 0.9% kundrejt tremujorit të mëparshëm.

Rënia e lekut në tremujorin e katërt lidhet kryesisht me shuarjen e efektit sezonal të verës, kur prurjet valutore nga turizmi historikisht sjellin një forcim të monedhës vendase.

Me bazë vjetore krahasimi, leku vijon të jetë i mbiçmuar kundrejt euros në krahasim me vitin e kaluar, por në një masë më të vogël. Forcimi vjetor i lekut është ngadalësuar ndjeshëm, duke zbritur në 1.4% në tremujorin e fundit të vitit, nga 3.4% në dy tremujorët paraardhës dhe nga 5.9% që shënonte në tremujorin e parë të vitit.

Banka e Shqipërisë bën të ditur se, në përgjithësi, tregtimi i euros në tregun valutor gjatë muajve të fundit ka qenë i qetë dhe nuk janë vërejtur pritshmëri të njëanshme për mbiçmim apo nënçmim të lekut. Treguesi i anshmërisë për mbiçmim ose nënçmim llogaritet si raport i numrit të ditëve kur leku është mbiçmuar ndaj numrit të ditëve kur leku është nënçmuar, në një horizont kohor prej 250 ditësh.

Vlera të këtij treguesi pranë nivelit 1 tregojnë për numër të përafërt rastesh mbiçmimi dhe nënçmimi ditor të lekut. Në analizën e Bankës Qendrore, ecuria e këtyre treguesve dëshmon për normalizim të pritjeve të agjentëve në treg dhe mungesë të ndërmarrjes së pozicioneve spekulative mbi ecurinë e ardhshme të kursit.