Lulzim Basha pret Elhaida Danin, i bindur për suksesin e saj në Eurosong

Kryetari i Bashkisë së Tiranës Lulzim Basha priti në një takim këngëtaren Elhaida Dani, përfaqësuese e Shqipërisë në festivalin europian të këngës. Në këtë takim ishte i pranishëm edhe drejtori i përgjithshëm i RTSH-së, Martin Leka. Kreu i bashkisë së Tiranës dhe i opozitës, Basha ka shprehur vlerësimin më të lartë për talentin e Elhaidës dhe për këngën e saj që do të përfaqësojë Shqipërinë në Eurovizion. Kryebashkiaku Basha theksoi se shqiptarët brenda dhe jashtë kufijve do të mbështesin fuqimisht këngëtaren shqiptare në Eurovizion dhe shprehu bindjen se performanca e saj do të vlerësohet dhe do të bëjë krenar çdo shqiptar. Pas suksesit në “The Voice of Italy”, ku Elhaida Dani u shpall fituese, festivali europian i këngës ku ajo do të përfaqësojë Shqipërinë është një tjetër sfidë ndërkombëtare për të.