Makina e James Bond – Aston Martin synon Bursën e Londrës me një vlerësim prej 5 mld paund

Prodhuesi i makinave luksoze, Aston Martin, synon të listojë aksionet në bursën e Londrës, ndërkohë që rritja e volumit dhe modeleve të reja ka rikthyer kompaninë në përfitueshmëri. Nëse plani rezulton me sukses, Aston Martin do të bëhet prodhuesi i parë i makinave në Britani  që listohet në Londër prej vitesh, ndërkohë që markat ikonë si Jaguar, Bentley dhe Rolls-Royce janë shitur te aksionerë të huaj.

Oferta publike fillestare, që do të jetë e ngjashme me atë të Ferrari, pritet ta vlerësojë kompaninë në 5 miliardë paund. Aston Martin deklaroi se do të nënshkruajë një dokument të regjistrimit me Autoritetin e Mbikëqyrjes Financiare në Britani dhe prospekti pritet të publikohet më datë 20 Shtator.  Plani do të përfshijë shitjen e zotërimeve nga aksionerët ekzistues, kryesisht kompanitë e kapitalit privat në Kuvajt dhe Itali dhe do të ketë një normë të aksioneve të mbajtura nga publiku (free float) në 25%.

Firma synon të aplikojë për një listim premium në bursën e Londrës dhe punonjësit e klientët do të kenë mundësi që të aplikojnë për të blerë aksione.  Kompania rezultoi me fitim vitin e kaluar për herë të parë që prej vitit 2010 dhe publikoi këtë javë një fitim përpara taksave për gjysmën e parë të vitit prej 42 milionë paund, ndërkohë që të ardhurat u rritën me 8% në 445 milionë, prej kërkesës së fortë për modelet Volante dhe DB11.