Maqedonia e Veriut mori “Po” pa kushte nga Gjermania, por “kërcënohet” nga Bullgaria

Maqedonia e Veriut është një ndër shtetet aspirante në rajonin e Ballkanit për anëtarësimin në Bashkimin Evropian.

Ndonëse pak ditë më parë në Bundestagun gjerman mori një “PO” ka kushte, pas arritjes së marrëveshjes historike të Prespës, sërish për Maqedoninë e Veriut ekziston një kërcënim real në rrugën drejt integrimit, Bullgaria.

Sofia mbështet dhënien e dritës jeshile, por me kushte. Së fundmi, në samitin e “The Ekonomist” i mbajtur në Shkup, zëvendëskryeministrja dhe ministrja e Punëve të Jashtme të Bullgarisë, Ekaterina Zaharieva tha se mbështetja e Maqedonisë së Veriut asnjëherë nuk ka qenë pa kushte.

“Mbështetja jonë për integrimin e Maqedonisë së Veriut në Bashkimin Evropian asnjëherë nuk ka qenë pa kushte, ka një kusht shumë të qartë, që ka të bëjë me marrëdhënie të mira fqinjësore”, deklaroi Zaharieva, e cila shtoi se “ nuk bëhet fjalë për kriter bullgar, por është një ndër kriteret për anëtarësim në BE”.

Po ashtu, gjatë fjalës së saj në samit, zyrtarja bullgare komentoi edhe Marrëveshjen e arritur të Prespës, por shtoi se pjesa historike mes Shkupit dhe Sofjes është çështje më e ndërlikuar.

“Marrëveshja e Prespës është marrëveshje bilaterale. Nuk është lehtë të ndryshohet emri i vendit, por pjesa historike mes Bullgarisë dhe Maqedonisë është më e vështirë”, theksoi Zaharieva.

Edhe më herët, presidenti bullgar Rumen Radev deklaroi se Sofja nuk dëshiron të bëhet pengesë për datën e bisedimeve për Maqedoninë e Veriut, por nga ana tjetër ka kërkuar reflektim nga Shkupi zyrtar.

Dy shtetet, Maqedonia e Veriut dhe Bullgaria më 1 gusht të vitit 2017, arritën një marrëveshje për fqinjësi të mirë, por zbatimi i saj ende nuk është arritur për shkak të dallimeve mes dy vendeve për prejardhjen etnike të disa personaliteteve nga e kaluara.