Ndahet nga jeta mjeshtri i humorit shkodran, Smajl Alia

Aktori i njohur i humorit shkodran, Smajl Alia është ndarë mbrëmë nga jeta në moshën 70-vjeçare pas një ataku kardiak.

Artisti shkodran spikati që në shkollë me një sërë interpretimesh të suksesshme.

Smajl Alia ka lindur më 1 mars të vitit 1945. Pasi kryen shkollën e mesme të ndërtimit në Tiranë, punon si teknik ndërtimi në shumë vepra industriale, që nga Laçi i Kurbinit, në Vaun e Dejës dhe Fierzë.

Talenti i tij si humorist spikati që në shkollë, ku më pas, për interpretime të suksesshme u nderua në grupet amatore shumë herë nga juritë e festivaleve lokale e kombëtare.

Në vitin 1982-1995 ishte aktor profesionist i Estradës së Shkodrës. Për lojën e tij me nivel e origjinalitet është dekoruar nga Presidiumi i Kuvendit Popullor të Shqipërisë.

Krahas aktivizimit interpretativ amator e profesionist, ai asnjëherë nuk e ka hequr penën nga dora, duke thurur bejte dhe shkruar skeçe, intermexo, parodi, poezi satirike apo tekste këngësh popullore.