Ndahet nga jeta poeti dhe shkencëtari Betim Muço

Shuhet një nga emrat e mëdhenj të kulturës dhe shkencës shqiptare.

Është ndarë nga jeta krejt papritur në moshën 68 vjeçare poeti, shkrimtari dhe shkencëtari i shquar Betim Muço.

Prej vitit 1997, profesor Betim Muço jetonte në kryeqytetin e SHBA Uashington D.C. Me ndarjen nga jeta të Betim Muços, Shqipëria ka humbur një nga intelektualët më të spikatur dhe zë veçantë. Poezia e Betim Muços është përkthyer në shumë gjuhë të botës, ndërkohë që ai i ka dhënë shumë shkencës shqiptare.

I lindur ne vitin 1947, Betim Muço mbaroi studimet në fakultetin e Shkencave të Natyrës në Tiranë. Për shumë vjet ai punoi në Institutin e Sizmiologjisë të Akademisë së Shkencave të Shqiperise dhe prej 1993 deri 1997 ka qenë drejtor i këtij Instituti.

Prej vitit 2001 ai ishte drejtuesi i networkut sizmiologjik të Shqipërisë. Betim Muço prej vitit 1997 jetonte në Uashington DC të SHBA. Ai është i njohur edhe për krijimtarinë e tij poetike dhe në letërsi. Një kontribut të rëndësishëm Muço ka dhënë edhe në përkthimin e letërsisë së huaj.

Ai ka botuar më shumë se 25 libra me vëllime poetike, tregime të shkurtra, novela dhe romane.