Në 82-vjetorin e Bilbilit të Kosovës, Nexhmije Pagarusha

Artistja e madhe shqiptare, Bilbili i Kosovës, Mbretëresha e Këngës Shqipe, Primadona e Melosit Popullor, Ema Sumak Shqiptare, “Madam Butterfly”, Zëri i Kristaltë, apo thjesht… Nexhmija, ka festuar ditën e djeshme 82-vjetorin e lindjes. Detajet se me kë dhe ku e ka kremtuar këtë përvjetor lindjeje akoma nuk bëhen të ditura, por ajo çka mbetet e sigurtë është fakti që Pagarusha rrethohet kudo e ngado me dashuri, pasi publiku është admirues i kësaj ikone. Një nga këngët më të dashura për të gjithë ne mbetet “Baresha”, këngë e cila këndohet sot e kësaj dite nga të gjitha grupmoshat. Nexhmije Pagarusha lindi më 7 maj 1933 në fshatin Pagarushë të Malishevës, ku ndoqi shkollën fillore, ndërsa shkollimin e vazhdoi për 3 vjet në Beograd në shkollën e muzikës për solo kanto. Veprimtaria e saj muzikore 40-vjeçare është aq e gjerë, saqë është vështirë të thuhet se cilit zhanër i takon. Është e njohur për interpretimet e saj të shkëlqyera në muzikën popullore dhe opera, por pati karrierë të suksesshme edhe si aktore, si në film ashtu edhe në teatër. Angazhimin e parë profesionist e pati në Radio Prishtinë, ku në vitin 1948 u pranua si soliste. Paraqitjen e parë skenike e realizoi në Beograd, ndërsa karrierën muzikore e përfundoi me një koncert në Sarajevë në vitin 1984, në mënyrë që edhe një herë t’i rikthehej skenës, në vitin 2000, kohë kur në Tiranë interpretoi këngën “Për ty”. Jehonën e muzikës popullore shqipe e përhapi në shumë vende të botës, ku interpretoi me Ansamblin “Shota”. Ndër rreth 150 këngët që ka interpretuar, mbetet e paharruar “Baresha”, e kompozuar nga bashkëshorti i saj, Rexho Mulliqi dhe me tekst të Rifat Kukajt, por edhe, “Ani mori nuse”, “Zambaku i Prizrenit”, “E dehur jam” dhe shumë të tjera. Nexhmije Pagarusha mori shumë çmime, ndër të cilat "Këngëtare e Shekullit" në Kosovë dhe Urdhrin “Nderi i Kombit”, me të cilin e dekoroi presidenti shqiptar Bujar Nishani në vitin 2012.