Një vit pa “Fantozzi-n”, ja ç’mendonte për popullin e tij

Një vit më parë ndërroi jetë Paolo Villaggio. Në moshën 84-vjeçare, më 3 korrik të 2017-ës do të ndahej nga jeta aktori i madh italian që krijoi personazhin e famshëm, Fantozzi. Gjenialiteti i tij i reziston kohës. Inteligjenca dhe humori e sidomos ironia mes sarkazmës dhe tragjikes, e bënë atë një protagonist të paharrueshëm të skenës italiane, por shumë të dashur edhe për shikuesin shqiptar. Dhe, tani sapo ka dale nëpër librari libri i tij me titull, “Italiani brava gente… ma non è vero”, (italianët njerëz të mirë… por nuk është e vërtetë) me perifrazim dhe nënshkrim të llogaritarit Ugo Fantozzi, i cili shpjegon se ia ka dhënë librin për ta lexuar e shoqja, zonja Pina, sipas së cilës “kuptohet që është shkruar nga një intelektuar ‘fals’ i së majtës”. Bëhet fjalë për një panoramë satirike dhe të pamëshirshme e pse jo gati profetike, shkruan tgcom., i asaj që italianët janë tani dhe si do të donin të ishin: “Një vend injorant televiziv, mbushur me kontradikta, mbushur me mafie, me Camorra, me hajdutë, të fundit në Europë”, shkruan i ndjeri Villaggio në përfundim të librit të tij.