Përurohet selia e re e Ministrisë së Kulturës, Kumbaro: Kultura tani, me tempullin që meriton

Ish-ambjentet e Kinostudios do të jenë nga sot e tutje selia e re e Ministrisë së Kulturës. Godina që mbarti historinë e filmit shqiptar gjatë periudhës së sistemit komunist, nis sot një tjetër histori. Pas një rikonstruksioni të plotë ajo do të jetë ‘shtëpia’ e re e Ministrisë së Kulturës, pas disa vitesh zhvendosje nga një objekt në tjetrin, ku i fundit ishte godina e njohur dikur si Lidhja e Shkrimtarëve dhe Artistëve të Shqipërisë.

Në ceremoninë e organizuar me këtë rast ministrja e Kulturës, Mirela Kumbaro, tha se godina e re nuk do të jetë vetëm shtëpia e administratës së dikasterit, por e të gjithë aktorëve të skenës, si dhe e partnerëve ndërkombëtarë e lokalë.

“Jo më kot e kemi vendosur Ministrinë e Kulturës duke e larguar nga qendra, sepse ka një pjesë të madhe të publikut që ka gjithë të drejtën të jetë pjesë e skenës kulturore, por që nguron t’i afrohet dhe në këtë mënyrë është qendra që shkon drejt njerëzve”, tha ministrja.

Duke iu referuar simbolikës që mbart për kulturën shqiptare ish-Kinostudio, Kumbaro tha se jemi në një territor ku pak besohej se do të rikthehej fuqia e publikut. “Unë besoj shumë tek institucionet publike dhe sot ato janë në vendin e tyre për të bashkëpunuar me të gjithë aktorët e shoqërisë shqiptare”, u shpreh ajo.
Kumbaro vuri në dukje se viti 2015 do të jetë një vit me reforma konkrete në fushën e kulturës, ku spikasin projektet në fushën e trashëgimisë kulturore.

Transferimi i Ministrisë në këtë godinë erdhi pas vendimit të Këshillit të Ministrave më 30 korrik 2014, ku u vendos kalimi në përgjegjësi administrimi tek Ministria e Kulturës i pasurisë “Godina 4-katëshe, magazina e kostumografisë”, në ish-Kinostudio.

Per rikonstruksionin e godinës u angazhua arkitekti Artan Shkreli, ndërsa projekti u mbështet financiarisht nga Albafilm. Brendia e godinës ruan autenticitetin e ndërtimit dhe fizionominë që ka pasur para dëmtimit. Investime janë bërë në fasadë, duke i dhënë një tjetër imazh ndërtesës.