Problemet para vitit të ri shkollor në rrethe
Shkolla pa ujë apo në gjendje të rrënuar, rënia e numrit të nxënësve dhe transporti në zonat e thella janë problematikat me të cilat po përballen shumë bashki në vend në prag të vitit të ri shkollor. Ndërkohë prindërit ankohen për radhët dhe çmimet e librave në shitje. Ata falas në shumë bashki do të shpërndahen ditën e parë të shkollës.
Godina në gjendje të amortizuar, rënia e numrit të nxënësve dhe siguria e mjeteve të transportit janë problematikat kryesore në qarkun e Dibrës në prag të nisjes së vitit të ri shkollor.
“Kemi shkolla pa ujë të pijshëm, kemi shkolla me problematika në sistemin hidro-sanitar”.
“Dihet gjendja e transportit, disponoj informacion që vetëm mjete nuk mund të konsiderohen.”
“Është problem numri i nxënësve sepse janë në klasa të bashkuara.”
Por ndërsa garantimi i kushteve në shkolla është detyrë e vendorëve, prindërit po përballen me vështirësi për tekstet.
Në shkollat e Lezhës, shpërndarja e librave nuk ka nisur edhe pse Ministria e Arsimit e njoftoi që më datë 2 shtator.
“Librat ishin aty, por kanë frikë mos i zhgarravisin fëmijët.”
Në disa bashki është vendosur se tekstet falas për klasat nga e para tek e pesta do të shpërndahen ditën e parë të shkollës.
“Librat kanë thënë që do të merren kur të fillojë shkolla.”
Ndërsa për librat nga klasa e 6-të deri në gjimnaz, prindërit në Elbasan dhe Vlorë ankohen për çmimet dhe radhët që krijohen pranë pikave të pakta të shpërndarjes.
“Ca i gjetëm, ca nuk i gjetëm. Kemi gjithë ditën që po bredhim.”
“Të shtrenjta janë, por ne do ti përballojmë.”
Duke filluar nga data 9 shtator, në afro 240 shkolla të vendit do të zhvillohen “inspektime të rastësishme”, të njoftuara nga Minisja e Arsimit, Besa Shahini, që në një mesazh për drejtuesit e shkollave tha se e gjithë infrastruktura në shkolla duhet të jetë gati.
/Ora News