Promovohet në Bruksel Libri “ Diplomacia për të gjithë”

Ishin të pranishëm edhe Ambasadorja e Shqipërisë pranë Bashkimit Evropian,  zonja Suela Janina, Ambasadorja e Kosovës, zonja Mimoza Ahmetaj, Ambasadori i Maqedonisë, Lazar Elenovski, deputeti  shqiptar i sapozgjedhur në Parlamentin e Brukselit, zoti Ahmet Gjanaj, e ngarkuara me Punë e Ambasadës, Suzana Sulollari, etj. 

Takimin e çeli Presidenti i Komitetit Kombëtar Evropian Shqiptar, intelektuali i njohur Ramadan Gjanaj. Më pas përshëndeti të pranishmit Sekretari i Përgjithshëm i CERIS, zoti Andre Miroir, i cili shprehu kënaqësinë që promovimi i këtij libri me vlera të spikatura bëhet në auditorin që mban emrin e një prej diplomatëve më të shquar belgë, A. Cohen.

Në vijim, të pranishmit dëgjuan përshëndetjen e Drejtores së Përgjithshme të Shtëpisë Botuese “ Toena, zonjës Irena Toçi, e cila evidentoi risitë  e këtij libri të  “ shkruar në kohën e duhur dhe nga një diplomat i duhur.”

Gazetari dhe publicisti Gjovalin Kola foli mbi vlerat që prezanton ky libër lidhur me dimensionin e diplomacisë zyrtare dy dhe shumëpalëshe, sfidat dhe problemet që kanë sjellë dukuritë e reja në këtë drejtim, arritjet dhe mangësitë e saj, etj. Pedagogja e shkencave politike dhe sociale të Universitetit të Lirë të Brukselit, Dr. Teuta Vodo u ndal me theks të veçantë në diplomacinë publike dhe kulturore, pëvojën ndërkombëtare dhe risitë në diplomacinë tonë, si dhe zhvillimet më të fundit në këto fusha përparësore për imazhin e vendit; profesori i shkencave politike të Universitetit të Leuvenit, Dr. Elhami Shaqiri u fokusua në raportet e politikës me diplomacinë, vlerat e analizës tërësore në diplomaci dhe të analistëve të shquar diplomtikë, si Shaban Murati e të tjerë;  Ermelinda Hajdari, menazhere marketingu në firmën e njohur belge “SIM” u përqëndrua  në aspekte të diplomacisë ekonomike dhe atë qytetare. Ajo bëri dhe një kalim në galerinë e pasur të portreteve dhe personazheve të shqiptarëve të dalluar me banim në Bruksel që vlerësohen gjerësisht në libër. 

Autori i librit falenderoi të pranishmit, panelistët, të ftuarit specialë dhe në veçanti dhe kolegët dhe drejtuesit e dikasterit për nxitjen dhe motivimin e tyre të vazhdueshëm në veprimtarinë intensive diplomatike të vendit tone.

Në përfundim të takimit, Ambasadorja Suela Janina përshëndeti të pranishmit, duke vlerësuar librin dhe përvojën e autorit; ajo i ftoi të gjithë bashkëatdhetarët të vijojnë në përpjekjet tona të përbashkëta për përballimin me sukses të sfidave madhore për integrimin e plotë në Bashkimin Evropian dhe si faktor i rëndësishëm në stabilitetin rajonal e më gjerë.

Bashkëbisedimi u kthye në një takim shumë miqësor ndërmjet bashkëatdhetarëve dhe të pranishëve të tjerë.

Përshëndetja e Botueses Irena TOÇI për pjesëmarrësit në ceremoninë e promovimit të librit   nw Bruksel

Të nderuar miq,

 "Diplomacia për të gjithë" i autorit Jorgji Kote nuk është libri i parë i tij, por është libri më domethënës që vjen si rezultat i natyrshëm i karrierës së tij të gjatë diplomatike, përplot me eksperienca jetësore dhe profesionale por edhe i kulturës së tij të gjerë akademike në këtë fushë.

Si rrjedhojë, do të thosha se është libri i duhur, i ardhur në momentin e duhur, i shkruar nga personi i duhur.

Por, kuptohet se ky libër nuk do të ishte lexuar me kaq kërshëri, dhe nuk do të kishte tërhequr vëmendjen e një numri të madh lexuesish nëse nuk do të ishte shkruar me një gjuhë të pasur por të thjeshtë, me argumenta e shembuj të kuptueshëm, me tema e trajtime interesante dhe me citime nga figura të shquara të diplomacisë botërore.

Por, veç të tjerash, veç kënaqësisë që përfton duke e lexuar, veç horizontit të qartë që të hap leximi i tij, mendoj se referimi dhe përqasja me realitet tona diplomatike, do kurajë dhe ndërgjegje të thellë profesionale dhe njerëzore e diplomati Jorgji Kote i ka dëshmuar të dyja me këtë botim.Ky libër vjen edhe si një etyd për të gjithë plejadën e diplomatëve të karrierës që kontribuuan në këtë fushë duke krijuar e ndërtuar kohë pas kohe dhe situatë pas situate imazhin e duhur për vendin tonë.

E përgëzoj autorin e palodhur, Jorgji Kote, për punimin e tij të radhës dhe e falënderoj për bashkëpunimin e tij të gjatë dhe frytdhënës me Shtëpinë Botuese Toena ndër vite.

Ambasadorja Suela JANINA duke përshëndetur të pranishmit.