Shqipëria, pjesë e projektit “Art D-0 ARK Underground”

“Jemi këtu sot për të prezantuar Projektin e Bienales për Artin Bashkëkohor Art D-0 ARK Underground, i cili na tregon se diplomacia përmes kulturës e kthen një vend të vogël ballkanik në një strehë Arti ndërkombëtar, një objekt të destinuar për luftë në një energji Arti”, u shpreh ministrja e Kultures, Mirela Kumbaro, në fjalën e saj, duke vijuar se me “eksperiencat e mëparshme me Bienalen e Arkitekturës 2014, pavijoni shqiptar, qe u vlerësua nga shtypi dhe vizitorët, apo ekspozitat Co-Existence dhe pjesëmarrja më e afërt në Bienalen e Venecias, përforcojnë më së miri dialogun kulturor shqiptar në arenën ndërkombëtare. I bashkohemi këtij projekti që ka patronazhin e UNESCO-s”, theksoi ajo.

“Kam kënaqësinë të them se edhe ministria e Kulturës gjen qasje të njëjta me projektet e rajonit, pasi po ecën me të njëjtat ritme dhe filozofi, po përpiqemi të shfrytëzojmë objekte të së kaluarës të konceptuara për luftë, për t’i kthyer në vende arti”, u shpreh Kumbaro.

Edo Hozić, Drejtor i Projektit të Bienales, u shpreh se “jemi shumë të lumtur që Shqipëria dhe Austria do të jenë partnere për këtë edicion. Ata do ta bëjnë më të fortë projektin tonë. Ju kujtoj se bunkeri i mbyllur, një histori për epokën e Luftës së Ftohtë, ka patur në edicionet e mëparshme rreth 44.000 vizitorë, duke u kthyer në një pikë të rëndësishme të artit bashkëkohor”.

D-0 Ark Underground është një eveniment i rëndësishëm i artit bashkëkohor në rajonin tonë, që zhvillohet në krye të dy viteve në Bosnje & Hercegovinë, në një bunker anti-bërthamor, ndërtuar gjatë viteve 1970.

Synimi kryesor i Projektit të Bienales është rikrijimi i lidhjeve të humbura në rajonin tonë. Institucione të të dyja entiteteve të Bosnjes dhe Hercegovinës e kanë mbështetur këtë Projekt të Bienales e me të drejtë ai eshtë quajtur një produkt i vërtetë i B&H. Këshilli i Evropës e ka shpallur Projektin e Bienales D-0 ARK Underground si një event kulturor të Evropës për vitin 2011.

Qëllimi i projektit D-0 ARK Underground është të mbrojë objektin ARK (Atomic War Command)- Komanda e Luftës Atomike prej shkatërrimit dhe në të njëjtën kohë t’i japë një jetë të re kësaj godine me energjinë që e sjell vetëm ARTI. Ky objekt do të transformohet në Muzen e Artit Bashkëkohor D-0 ARK.

Projekti i Biennales për Artin Bashkëkohor D-0 ARK Underground mbështet çështje të demokracisë, tolerancës,pranimit të diversitetit dhe variacionit të identiteteve dhe si të tillë përfaqëson një event të rëndësishëm rajonal kulturor.