Të lodhur nga konflikti, të lodhur nga mosbesimi

Nga Kolë Gjoka

Vetëm të kritikosh. Përçarja politike e shoqërisë shqiptare është relativisht e thellë. Ka pasur tentativa sporadike për ta minimizuar, por gjithmonë ka munguar guximi. Tani që fryn një erë e re e komunikimit pozitë-opozitë, të dy liderët kritikohen për këtë dhe ju quhet si dobësi përballë kundërshtarit politik. Kush janë ata që vetëm kritikojnë dhe asnjëherë nuk inkurajojnë? Sa të drejtë kanë me kritikat e tyre? Mendoj që të drejtën të kritikojë e ka kushdo. Ama kritika duhet të shoqërohet edhe me zgjidhjet. Kur prezanton edhe mënyrën e zgjidhjes së problemeve bëhesh edhe më i besushëm në publik. Gjithashtu me një rëndësi të veçantë është edhe mënyra se si i kam menaxhuar vetë situata të tilla. Kush janë ata që vetëm kritikojnë dhe e shikojnë realitetin në bazë të parimit „ ose me mua ose kundra meje“ ? Ata jemi ne, se me të tillë fryme e njohëm pluralizmin ! Do të ishte mirë që gjithësecili nga ne të shikojë veten në pasqyrë dhe të mendohet për ato që thotë. Jemi të lodhur nga fryma e konfliktit, jemi të lodhur nga mosbesimi. Kemi nevojë për bashpunim dhe bashkërendim. Një model tjetër i komunikimit, fatmirësisht, kanë liderët e pozitës dhe opozitës shqiptare. Është një model i ri, një model i njerëzve me kulturë perëndimore. Mënyra e komunikimit në distancë ka ndryshuar. Vlerësimet e ndërsjellta janë kthyer në normalitet. Vlerësoj si shumë produktive dhe shumë normale takimet e tyre jashtë kornizës zyrtare. Sot më shumë se kurrë na duhet kordinimi i veprimeve. Ne duhet të merremi më shumë me rezultatet, me drejtimin dhe ti shikojmë gjërat me pozivitet. Një gotë të mbushur gjysëm ta quajm gjysëm-plot dhe jo gjysëm-bosh. Përfitues nga kjo mënyrë bashkëpunimi është shoqeria shqiptare, është kombi shqiptar!