Zbulimi i papritur/ Shefi i “Alibaba”, Jack Ma është anëtar i Partisë Komuniste Kineze!

Jack Ma, bashkëthemeluesi i kompanisë së madhe  të tregtisë online “Alibaba” është konfirmuar zyrtarisht si anëtar i Partisë Komuniste, sipas një gazete shtetërore.

Ma, që është personi më i pasuri në Kinë, është një nga 100 njerëzit që Komiteti Qendror i Partisë Komuniste Kineze do të nderojë si pjesë e festimeve që do të bëhen me rastin e 40 vjetorit të reformave ekonomike.

Mbetet e paqartë se pse gazeta zyrtare vendosi të tregojë lidhjen politike të MA-së megjithatë ky zbulim vjen në një kohë kur ka një lëvizje në Pekin për të afruar sipërmarrjet e vendit me politikat e vlerat partiake, veçanërisht në sektorin e teknologjisë që ka njohur rritje me shpejtësi.

Ma, ka njoftuar se do të japë dorëheqjen si drejtues i “Alibaba-s” vitin e ardhshëm ndërsa në karrierën e tij ka shërbyer si këshilltar i liderëve politikë në Azi dhe Europë ndërsa ka shpalosur ambicie të mëdha kundrejt Shteteve të Bashkuara të Amerikës.