Alibeaj: Katër deputetë të mazhorancës s’mund të votojnë për Presidentin e ri. Janë të etiketuar “non grata”

Kreu i grupit parlamentar të Partisë Demokratike, Enkelejd Alibeaj, foli sot lidhur me çështjen e zgjedhjes së presidentit të ri të Republikës.

Në një deklaratë për mediat, Alibeaj tha se: Non-gratat nuk kanë të drejtën morale dhe politike për të votuar për presidentin. Duhet të jetë një president jo i afektuar nga votat non-grata. Duhet të zgjidhet një profil politik, këto janë sugjerime të miat. Duhet të jetë një njeri i ekuilibrave, që ka treguar se përballet me dinjitet testeve politike. Procesi i zgjedhjes së presidentit të Republikës të jetë serioz, që mos të ngutemi. Jam i mirë në matematikë! Nuk është çështje numrash, por procesi të jetë gjithëpërfshirës.

Lidhur me situatën brenda PD-së, Alibeaj theksoi se platforma e bashkimit që ai ka paraqitur disa javë më parë “është libri i shenjtë i demokratëve”.

“E kemi bërë të qartë, grupi parlamentar ka nxjerrë platformën e parimeve të bashkimit, është libri i shenjtë për demokratët që i bën të gjithë bashkë, duhet t’i bëjë, është në fuqi do jetë në fuqi gjithë kohës.

Është diskutuar gjerë e gjatë prej disa javësh në mbledhje të gjata diskutime e takime me gjithë deputetët, është shprehur fare qartë qëndrimi i tyre, fatkeqësisht pati një refuzim, besoj që kjo është një çështje tashmë s’ka asnjë kërshëri përtej kësaj”.