Franca mbështet anëtarësimin e plotë të vendeve të Ballkanit Perëndimor në Bashkimin Europian dhe nuk synon të vendosë veton apo të krijojë një lloj partneriteti të privilegjuar për këto vende. Ambasadori i Francës në Serbi, Jean Louis Falconi, përpiqet të shuajë zërat se Emannuel Macron do të propozojë një alternativë tjetër ndaj integrimit të plotë: “Nuk ka asnjë “veto” dhe asnjë “partneritet të privilegjuar” alternativ! Ka të bëjë me përmirësimin e procesit të zgjerimit: Franca është e angazhuar për anëtarësimin e plotë të Ballkanit Perëndimor dhe Serbisë në BE”.
Falconi shpjegon se ajo që Franca i kishte propozuar Këshillit Europian ishte ideja e modernizimit të procesit të pranimit, duke u mundësuar vendeve kandidate të cilat kanë përmbushur kushtet në fushë të caktuara, të shfrytëzojnë benefitet e tyre, në vend të që të presin për përfundimin e të gjithë procesit.
Ai shpjegon se në këtë mënyrë, procesi i ngadalshëm aktual i pranimit në BE, do të bëhej më i shpejtë, progresiv por gjithashtu i kthyeshëm: ”Ideja është se, kur një vend përfundon me negociatat në fusha të caktuara, do të mund të ulet në të njëjtën tryezë me shtetet anëtare e të marrë pjesë në politikëbërje, por pa të drejtën e votës”. Falconi kujton se Macron kishte qenë i qartë gjatë vizitës së tij në Serbi në muajin korrik, kur kishte konfirmuar premtimin se anëtarësimi i Ballkanit Perëndimor në Bashkimin Europian do të realizohej.
