Arrihet marrëveshja, armëpushim i përkohshëm në Ukrainë dhe korridore humanitare

U desh raundi i dytë i bisedimeve prej 3 orësh, që Rusia dhe Ukraina të arrinin në një marrëveshje për krijimin e korridoreve humanitare, dhe armëpushim të përkohshëm.  Palët nuk arritën një marrëveshje për ndalimin e luftimeve ose përfundimin e operacionit special rus.

Nga ana e saj, Ukraina kërkon ndalim të menjëhershëm të sulmeve, armëpushim, hapjen e korridoreve për evakuimin e civilëve nga qytetet e bombarduara.

Pozicioni i Rusisë nuk ka ndryshuar që nga dita e parë.

”Ukraina duhet të “demilitarizohet” dhe të “denazifikohet”. Gadishulli i Krimesë, i aneksuar nga Rusia në vitin 2014, duhet të njihet si pjesë integrale e saj. Dy krahinat separatiste në Ukrainë, Republika Popullore e Luhanskut dhe Republika Popullore e Donetskut, të njihen si të pavarura zyrtarisht”.

Mes palëve do të ketë edhe një raund të tretë të bisedimeve për të arritur në më shumë negociata që mund ti japin fund luftës.