Astrit Patozi: Pas Amerikës vjen Zoti

Kreu i partisë “Bindja Demokratike” Astrit Patozi i është bashkuar reagimeve të shumta lidhur me trazirat e fundit në Shtetet e Bashkuara të Amerikës të shkaktuara nga protesta e thirrur nga presidenti në detyrë Donald Trump, protestë që shënoi dhe kaos në ndërtesën e Kapitolit, në Uashington.

“PAS AMERIKËS VJEN ZOTI

Ne jemi shumë të vegjël dhe ndoshta të fundit, që mund të flasim apo të shpjegojmë ngjarjet e djeshme shokuese në Uashington. Për vetë historinë, peshën, por ndoshta më shumë për shkak të problemeve tona ciklike me lirinë dhe shtetin e së drejtës në 30 vjetët e fundit.

Sepse sa herë që ka ndonjë hall të madh me demokracinë në botë, të gjithë kthejnë sytë nga Amerika, duke e konsideruar atë si pikën fundore, prej ku mund të kërkohet dhe gjendet zgjidhja.

Por kur i ndodh asaj vetë, të gjithë duhet të ndjehen të lënduar, të trembur më pak të mbrojtur dhe më të pasigurt se më përpara.

Se përtej saj nuk mund të presësh gjë tjetër. Pas Amerikës vjen vetëm Zoti. Dhe ndoshta pse është kështu, prej andej do të vijë shpejt edhe shërimi”, shprehet Astrit Patozi në rrjetet sociale.