Iku koha e përjashtimit të grupit të deputetëve të Berishës nga parlamenti dhe ka filluar largimi nga PS i deputetëve të grupit të Bashës.
Sot Lindita Nikolla përjashtoi Lulzim Bashën.
Pas përjashtimit nga seanca për shkak të bllokimit të foltores, Lulzim Basha është larguar nga salla.
Në fjalën e tij para mediave, Basha u shpreh se zgjedhorja është shkaku i gjithë të këqijave, sepse sjell zgjedhje të deformuara.
Ai shtoi se PD ka insistuar që në fillim për një Reformë Zgjedhore në shërbim të qytetarëve, ndaj ka kërkuar lista të hapura.
“Zgjedhorja është shkaku i gjithë të këqijave, sepse sjell zgjedhje të deformuara, sjell parlamentarë kokëulur, që votojnë ligje, të cilat nuk janë në dobi të qytetarëve, por të oligarkëve. Prandaj, PD ka 2 vite që fokusohet për të pasur një Reformë Zgjedhore korrekte.
Listat e hapura janë domosdoshmëri për të prishur paktin e 2008, që ua hoqi të drejtën qytetarëve, që në parlament të shkojë ai individ që duan ata e jo ata që duan kryetarët e partive. Shqipëria duhet të jetë një zonë zgjedhore, që votat nga Kukësi në Vlorë të jenë njësoj të vlefshme, sikundër duhet të votojë edhe diaspora”, u shpreh Basha.