Kreu i Partisë Demokratike, Lulzim Basha është i ftuar në “5 pyetjet nga Babaramo”, për t’iu përgjigjur ftesës së kryeministrit Edi Rama.
Përmes një video live në facebook, ku prezantoi paketën e dytë të ndihmës ekonomike, Rama tha se “Të bashkojmë forcat, të ballafaqojmë vendimet që marrim dhe cilësinë e ekzekutimit të tyre. T’i flasim popullit me një zë për të mbrojtur jetën e qytetarëve. Uroj që ky apel i sinqertë të mos bjerë në vesh të shurdhër”.
Kurse Basha thotë se propozimet e PD-së Rama i ka aty. “Unë nuk do të përfshihem në asnjë debat, dhe i bëj ftesë që të shmangë retorikën dhe gjuhën e ashpër ndaj opozitës dhe të fokusohet te prioriteti i qytetarëve, shëndeti dhe ekonomia. Ky është prioriteti im, ekspertët tanë janë gati në cdo moment të qytetarëve në fushën e shëndetësisë, ekonomisë, propozimet janë konkrete. E gjithë energjia dhe vëmendja e opozitës janë në shërbim të njerëzve. Paketa që shpalli presim të miratohet dhe ta analizojmë. Ne kemi shqetësime në dy rrafshe, që të mos ketë hendek mes asaj që thuhet dhe bëhet dhe nevoja për të ndërtuar një plan, që jo vetëm të japë shpresë por edhe rrugë për të dalë, strategji për të cilën kyçe është testimi”.