Basha mbledh grupin për përmbytjet, listë kërkesash në drejtim të Ramës

Pasi pa në terren gjendjen e vështirë ku ndodhen mijëra banorë të jugut të vendit, kreu i PD-së Lulzim Basha thirri mbledhjen e grupit parlamentar.

Duke e cilësuar kabinetin Rama si qeveri të demagogjisë dhe mashtrimeve, Basha i kërkoi Kryeministrit:

“-Të shpallë gjendjen e emergjencës.

-T’i futen punës, të organizojnë me plane konkrete mbështetjen e banorëve të zonave të përmbytura, lehtësimin e gjendjes së tyre, plotësimin e nevojave të tyre të domosdoshme.

-Të informohet media dhe publiku në mënyrë zyrtare, në çdo orë të ditës, për gjendjen dhe zhvillimet në zonat e goditura.

-Të përllogariten në vijimësi humbjet dhe të vendoset kompensimi i tyre konform ligjeve të vendit.

-Të marrin masa pa humbur kohë për të evituar përmbytjet dhe fatkeqësitë e evitueshme në zonat e tjera të vendit që mund të goditen në ditët në vijim nga reshjet dhe moti i keq.

-Të rishikohet buxheti i shtetit më qëllim alokimin dhe rritjen e fondeve për bujqësinë dhe mbrojtjen nga përmbytjet dhe moti i keq, duke hequr dorë nga investimet dhe shpenzimet e luksit dhe korrupsionit qeveritar”.

Përveç këtyre masave, lideri i opozitës kërkoi nga kundërshtari i tij politik përgjigje për disa pyetje:

“Pse ke ulur e shkurtuar investimet për bujqësinë, për hidrovoret, për kanalizimet, për kullimin, për veprat mbrojtëse të tokës dhe vendbanimeve? Pse i destinon paratë e taksapaguesve tek vila e gjethit, tek bunkarti yt, tek festa e dritave, e të tjera vepra luksi “Jessie James” dhe korrupsioni qeveritar, si ato që kemi denoncuar dhe nuk i çon aty ku janë nevojat me të mëdha për sigurinë e shtëpive, tokave, bagëtive dhe jetës të qytetarëve”.

Për Kreun e demokratëve, emergjenca më e madhe që ka vendi është papërgjegjshmëria e Kryeministrit, duke paralajmëruar edhe protesta.

“Dhe shumë shpejt kjo shumicë do të jetë aq e madhe e aq zëlartë për tu ndjerë rehat vetëm me hapësirën e jashtëzakonshme të Bulevardit “Dëshmorët e Kombit”, apo sheshit Skënderbej apo të çdo sheshi tjetër në Shqipëri”.

Fjalës së Bashës nuk i mungoi falenderimi për të gjithë strukturat e shtetit dhe vullnetarët që po ju vinë në ndihmë banorëve të prekur nga kjo katastrofë natyrore.