Basha mbledh Kolegjin e Kryetarëve: Vendimet e marra në Kuvend ishin historike

Kryetari i PD, Lulzim Basha, ka mbledhur sot Kolegjin e Kryetarëve. Gjatë fjalës së tij para gazetarëve, Basha deklaroi se është koha që të lihen pas 2 vite tollovi dhe të ecet përpara.

Mbajtja e Kuvendit dhe numri i të pranishmëve sipas Bashës, dëshmoi rigjetjen e besimit në strukturat drejtuese të PD.

“Mirënjohje për të gjithë ju për të mundësuar kuorumin e PD, por dhe për pjesëmarrje që dëshmon për rigjetje të besimit në strukturat drejtuese të PD. Është dhe një barometër i shpresave dhe pritshmërisë e vendosshmërisë së demokratëve për të lënë pas 2 vite tollovi dhe për të ecur para.

Morëm vendime domethënëse dhe historike do thoja në Kuvendin Kombëtar. PD nuk ekziston për t’i shërbyer vetes së saj, por interesit kombëtar.

Në 2 shtator vendimet e Kuvendit janë të qarta, u morën vendime që të ndryshojmë e mos mbetemi në këtë hulli politike, që axhendën e bëjnë interesat e ngushta të një grupi që politikën e shohin si instrument përfitimi, pasurimi dhe imuniteti. Rrugës sonë të qartë përpiqet t’i mbivendoset edhe një herë axhenda e atyre që për interesat e tyre personale shkaktuan krizën këto dy vite, dhe që për llogari të tyre personale në raport me drejtësinë, pasuritë e paligjshme, harrojnë që as PD dhe as demokratët nuk i kanë asnjë borxh”, u shpreh Basha.