Basha me të rinjtë në Shkodër: Të rrëzojmë modelin e qeverisjes me kriminelë

Kryetari i PD, Lulzim Basha zhvilloi pasditen e sotme një takim me të rinjtë në Shkodër. Gjatë fjalës së tij, Basha përmendi edhe raportin e fundit të Bankës Botërore, sipas të cilit situata me korrupsionin në vend është më keq se 6 vite më parë.

Sipas Bashës, kjo që po përjetojmë nuk ka të krahasuar as me periudhat më të errëta.

“Ajo që po përjetojmë sot nuk krahasohet as me periudhën më të errët të stanoacionit. Raporti i BB thotë se korrupsioni është dyfishuar krahasuar me vitin 2013 dhe është më keq se në vitin 2005”, u shpreh Basha.

Kreu i PD-së tha se misioni i opozitës është të rrëzojë modelin e qeverisjes me krimin. “Modeli i qeverisjes me kriminelë është modeli që duhet të rrëzojmë dhe të ndërtojmë një model normal europian”,- tha Basha.

Lideri i opozitës nuk la pa përmendur as plagën e emigracionit tek të rinjtë. “Plaga më e madhe, plaga e emigracionit të rinisë. Po ikin nxënësit dhe po boshatisen shkollat. Mësova se në Vukatanë brenda një nate kishin ikur 30 të rinj”, u shpreh kryedemokrati.