Basha-Ramës: Dëgjo zërin e qytetarëve

Në një konferencë për mediat nga selia e PD-së, Basha i kërkoi Kryeministrit që të kuptojë situatën eksplozive të vendit dhe të reagojë me përgjegjshmëri, në të kundërt ose duhet të largohet ose do rrëzohet. “Protesta konfirmoi hendekun e thellë mes një Shqipërie me halle të shumta dhe qeverisë. Edi Rama nuk doli nga bunkeri, nuk dëgjoi zërin e qytetarëve.

 I kërkoj kryeministrit të kuptojë situatën eksplozive të vendit dhe të reagojë me përgjegjshmëri, të dëgjojë zërin e qytetarëve.  Në emër të shumicës së shqiptarëve që luftojnë për mbijetesë i kërkoj Kryeministrit të ndalë rritjen e çmimit të energjisë elektrike, të rishqyrtojë paketën fiskale të 2015, të heqë dorë nga rritja e cdo takse apo akcize, të ulë në nivelin 10 % taksimin maksimal, të mbajë premtimin për legalizim falas, të kthejë në detyrë policinë e shtetit, të ulë shpenzimet maramendëse qeveritare, të garantojë vijimin e studimeve për cdo student që u godit nga pseudoreforma, të heqë tvsh për energjinë për shtresat në nevojë”, theksoi Basha.

Ndërsa e cilësoi Kreun e Qeverisë si barrën më të padurueshme për qytetarët e këtij vendi, kryetari i PD-së theksoi se protesta e 22 Nëntorit ishte protesta e hallit të përbashkët. “Në bulevard doli Shqipëria e harruar, Shqipëria e mjeruar, Shqipëria e dhunuar nga Qeveria Rama-Meta. Në protestë ishte Shqipëria kundër rritjes së çmimeve dhe taksave të reja, ishte Shqipëria kundër varfërisë, por ishte edhe Shqipëria e shpresës dhe e të ardhshmes”, theksoi Basha.

Duke falenderuar çdo pjesëmarrës në këtë protest, breu demokrat tha se ajo tregoi vlerat dhe kulturën demokratike, vlera më të mira perëndimore.