Basha sërish thirrje qeverisë: Shpallni gjendjen e jashtëzakonshme

Kreu i PD-së Lulzim Basha, ka shkuar të vizitojë të prekurit e tërmetit në Durrës dhe ka bërë një thirrje për qeverinë.

Basha deklaroi se qeveria duhet të shpallë gjendjen e jashtëzakonshme për të përballuar situatën e rëndë që është krijuar në zonat e tërmetit.

“Përsëris thirrjen ndaj qeverisë për të mos u vonuar asnjë çast me shpalljen e gjendjes së jashtëzakonshme”, shkroi Basha në facebook.

Ndër të tjera, ai kërkoi që të punojmë si një familje e madhe për të kaluar këtë tragjedi që ka prekur vendin tonë. Raportohet se deri tani janë 16 të vdekur dhe 600 të plagosur. Mes tyre 9 janë në gjendje të rëndë. Ndërkohë lëkundjet nuk ndalen. Tërmeti i fundit ishte në orën 14:00 me magnitudë 5.

Deklarata e plotë e kreut të PD-së, Lulzim Basha

Pas Thumanës pranë familjeve dhe banorëve të Durrësit. E kam të vështirë të gjej fjalë për dhimbjen që prek dhe ndjej tek prindërit dhe të afërmit që kanë humbur më të dashurit e tyre. Por po kaq i prekur jam nga kurajo dhe solidariteti i njerëzve, që megjithë tronditjen, gjejnë forcë për të ndihmuar, për t’iu gjendur pranë bashkqytetarëve dhe familjeve në fatkeqësi.

Mirënjohje dhe mbështetje totale për çdo qytetar, mjek, infermier, punonjës policie, personelin e strukturave të emergjencës dhe të forcave të armatosura që megjithë kushtet dhe rrethanat e rënda po sakrifikojnë për të goditurit nga tragjedia. Nga Durrësi përsëris thirrjen ndaj qeverisë për të mos u vonuar asnjë çast me shpalljen e gjendjes së jashtëzakonshme dhe për të mbështetur operacionet e emergjencës me bazë materiale adekuate.

Vëllezër dhe motra, të bëjmë gjithçka për të ndihmuar dhe për t’ju gjendur pranë çdo bashkëqytetari që ka humbur të afërmit, për ata që janë akoma nën rrënoja, me shpresën dhe lutjet për jetët e tyre, për të lënduarit dhe për të dëmtuarit nga kjo fatkeqësi. Të gjithë në këmbë, ti japim dorën e ndihmën njëri-tjetrit, pa kushte dhe pa kursyer asgjë. Të bashkuar si një familje e madhe, do t’a kalojmë këtë fatkeqësi.

Zoti ju bekoftë ju dhe familjet tuaja!

Lexoni edhe

• Tërmet i fortë, 600 të plagosur dhe 15 të vdekur. Pallate e hotele të rrëzuara
• Pamjet e tmerrshme të pasojave të tërmetit në Shqipëri (FOTO/VIDEO)
• Pamjet me dron, pasojat e tërmetit në Thumanë
• Rumani nisa drejt Shqipërisë një avion me 52 efektivë specialë
• Presidenti Meta vizitë në Shtabin e Emergjencës në stadiumin e Durrësit
• Sizmiologu grek niset për Shqipëri: Dëmet nuk erdhën nga forca e lëkundjeve
• Pse ndodhin tërmetet në Shqipëri? Analiza e sizmiologut Kasaj
• Solidariteti i Sgarbit: Supet e shqiptarëve nuk kërrusen kurrë
• Durrësi, një tragjedi e paralajmëruar!