Basha takon kryeministrin e Kroacisë: Për Shqipërinë nuk ka alternativë tjetër veç integrimit në BE

Kryetari Partisë Demokratike Lulzim Basha ka zhvilluar sot një takim me kryeministrin e Kroacisë Andrej Plenkoviç, në fokus të së cilit ka qenë rruga drejt bashkimit të Shqipërisë me familjen evropiane. Sipas Bashës, për Shqipërinë nuk ka dhe nuk mund të ketë alternativë tjetër veç integrimit në BE.

Po ashtu, kryedemokrati theksoi se zbatimi i reformës në drejtësi, kryerja e reformës zgjedhore dhe zbatimi i saj sipas udhërrëfyesit gjerman garanton shtetin e së drejtës, i jep fund të pandëshkueshmërisë, ndan  politikën nga krimi dhe garanton zgjedhje të lira e të ndershme.

“Kënaqësi të takoja sot mikpritësin e Kongresit të EPP në Zagreb, kryeministrin e Kroacisë Andrej Plenkovic. Presidenca e BE nga Kroacia në Janar 2020 është një lajm shumë i mirë për Shqipërinë dhe gjithë rajonin.

Për Shqipërinë nuk ka dhe nuk mund të ketë alternativë tjetër veç integrimit në BE dhe për këtë, Partia Demokratike dhe unë jemi të vendosur të ndërmarrim çdo vendim dhe hap të nevojshëm.

Zbatimi i drejtë i reformës në drejtësi, reforma zgjedhore dhe zbatimi i saj sipas udhërrëfyesit gjerman, garantojnë shtetin e së drejtës, ndan  politikën nga krimi, i jep fund pandëshkueshmërisë, dhe garanton zgjedhje të lira e të ndershme.

Me mikun tim dhe të shqiptarëve diskutuam hapat për kapërcimin e  krizës politike në vend, e cila konsiderohet nga vendet anëtare të Bashkimit Europian si pengesë serioze për nisjen e bisedimeve të anëtarësimit të Shqipërisë në Bashkimin Europian.

Ramë dakort të koordinojmë veprimet dhe vendimet tona për të realizuar të gjitha detyrat e shtëpisë dhe për të mundësuar hapjen sa më parë të negociatave. 

Kryeministri Plenkovic më garantoi se Kroacia do të vijojë të jetë avokate e fuqishme e Shqipërisë në procesin e anëtarësimit në BE”, shprehet kreu i PD-së, Lulzim Basha në njoftim të shkurtër të shpërndarë përmes rrjeteve sociale.