Basha urdhëron zhvillimin e zgjedhjeve në FRPD

Nga burime pranë PD-së mësohet se Kryetari i Partisë Demokratike, Lulzim Basha ka urdhëruar zhvillimin e zgjedhjeve në Forumin Rinor të Partisë Demokratike, për herë të parë pas 14 viteve.

Pak minuta më parë i është shpërndarë të gjitha degëve në rrethe, Udhëzimi për Organizimin e Zgjedhjeve për Organet Drejtuese të Forumit Rinor, material i cili i hap rrugën zgjedhjeve për kryetarin e ri të Forumit Rinor të Partisë Demokratike dhe strukturave të tjera të FRPD – së,  parashikon që zgjedhjet e reja në degë të ndahen në dy faza, duke zgjedhur kryetarin e FRPD fillimisht, sipas modelit “një anëtarë, një votë” dhe faza e dytë, ajo e zgjedhjes së kryetarëve të degëve  të FRPD dhe strukturave drejtuese të Degëve.

Edhe për zgjedhjet në FRPD do të ndiqet i njëjti model i cili zgjodhi ekipin e ri drejtues të Partisë Demokratike para dy vitesh, kur u zgjodh fillimisht kryetari i ri i PD dhe më pas drejtuesit në degë. Ndërkaq, udhëzimi për FRPD tregon edhe se si do të bëhet fushata e anëtarësimeve. Udhëzimi parashikon se fushata do të zgjasë 30 ditë nga shpallja e urdhrit.

Anëtarësimet do të bëhen në të gjitha degët e FRPD dhe do t’i dorëzohen Grupit të Punës në përfundim të procesit, brenda datës 12 Nëntor 2015.