Baton Haxhiu: Fjalimi i Edi Ramës u redaktua në avion, darka Rama-Vuçiç ishte shumë e ftohtë

Në emisionin Info Magazina në Klan Kosova, Haxhiu tha se fjalimin e përgatitur më herët Rama e ndryshoi në aeroplan teksa po udhëtonte për në Beograd.

Haxhiu theksoi se deklarata e Ramës për kryeministrin serb Aleksandër Vuçiç ishte mjaftë e rëndë.

“Në darkën që u zhvillua mbrëmë në mes të dy kryeministrave Ramës dhe Vuçiçit, mund të them se ishte një darkë shumë e ftohtë, pasi gati rreth 15 minuta Rama dhe Vuçiç nuk janë takuar me njëri-tjetrin. Vuçiç gjatë tërë kohës ia përsëriste Ramës: Pse ma bëre këtë?”, tha Haxhiu, për të shtuar se po të mos ishte Angela Merkel, vizita në Preshevë nuk do të realizohej.

Gjatë debatit të Info Magazine u trajtuar edhe çështja e pozitës së Edi Ramës tek ndërkombëtarët. Në këtë pikë, Glauk Konjufca nga Vetëvendosje tha se tani e tutje evropianët do ta respektojnë më tepër Edi Ramën.

Konjufca, i cili ishte kundër kësaj vizite, tha se është befasuar për mirë kur Edi Rama në mënyrë të drejtpërdrejtë tha se Kosova është një fakt i patjetërsueshëm dhe i pakthyeshëm.