Një ngjarje tragjike ka tronditur Shkodrën, duke lënë pas dhimbje, por edhe një ndjenjë krenarie për aktin heroik të një prej bijve të saj më të mirë. Kapiteni i anijes turistike, Arben Anamali, humbi jetën pasi u përpoq të shpëtonte jetën e të tjerëve gjatë një incidenti të rëndë, duke u kthyer në simbol të guximit dhe sakrificës.
Kryetari i Bashkisë Shkodër, Benet Beci, i ka bërë homazhe të ndjera kapitenit, duke e cilësuar si një njeri që zgjodhi të mbrojë të tjerët dhe dinjitetin e qytetit të tij, përballë rrezikut që i mori jetën. “Shkodra humbi një bir, por fitoi një hero”, shkruan Beci në një status prekës në rrjetet sociale, duke vlerësuar aktin e Anamalit si një sakrificë që lartëson emrin e qytetit dhe gjithë vendit.
Postimi i plotë:
Shkodra përulet për njeriun, heroin Arben Anamali.
Ai nuk ishte thjesht një punonjës, as thjesht një kapiten anijeje. Ishte një njeri që zgjodhi jetën e të tjerëve para jetës së vet.
Një ngjarje e rëndë, që tronditi gjithë Shkodrën, por që njëkohësisht lartësoi emrin e qytetit dhe të Bashkisë Shkodër.
Me guximin, sakrificën dhe zemrën e tij, ai mbrojti jo vetëm jetën e turistëve që ndodhej në rrezik, por edhe nderin dhe dinjitetin e vendit të tij. Kapiteni nuk u kthye më, por la pas një vepër që e bëri të përjetshëm në kujtesën e të gjithëve.
Shkodra humbi një bir, por fitoi një hero.
Kapiteni Arben Anamali bëri atë zgjedhje që vetëm të rrallët mund ta bëjnë: të japësh jetën për një mik të qytetit dhe për të mbrojtur emrin e tij.
Sot, secili prej nesh do të donte të kishte guximin e tij… por vetëm ata që lindin heronj janë të aftë ta bëjnë këtë sakrificë.
Bashkia Shkodër i qëndron pranë familjes së tij në këtë dhimbje të madhe.
Përulje dhe nderim të përjetshëm për heroin tonë, Arben Anamali.🙏