Berisha: Anglia të analizojë shkaqet e shndërrimit të shqiptarëve në popull të gomoneve nga qeveria e Ramës

Kreu i PD Sali Berisha në një komunikim për mediat ka folur për situatën e emigrantëve shqiptarë si edhe për deklaratat e sekretares së brendshme Britanike lidhur me emigrantët, por nuk ka kursyer edhe kritikat ndaj qeverisë Rama.

“Në Britaninë e Madhe, në media, parlament e qeveri ka shqetësime serioze për fluksin e paparë të refugjatëve shqiptarë që kalojnë kanalin me shpresën e një jete më të mirë në atë vend, deri tani fluksi ka arritur në 12 mijë shqiptarë nga 800 që ishte në 2021.

Kjo përbën një situatë serioze e shqetësuese për çdo vend e polemika lidhur me të është  e pashmangashme.

Duke mos u pajtuar me asnjë etiketim të padrejtë ndaj refugjatëve shqiptarë nga mediat apo politikanë britanike, PD falënderon Mbretin Charles III për ndërhyrjen e tij fisnike në këtë polemikë.

PD hedh poshtë deklaratën e Ramës në të cilën ai fajson për gjendjen e krijuar autoritetet e Britanisë së Madhe duke treguar me gisht konservatoret britanikë.

PD fton qeverinë, parlamentin e MB të ndalen e analizojnë shkaqet e shndërrimit të shqiptarëve në popull të gomonëve nga qeveria e Ramës se kjo mund t’i ndihmojë të kuptojnë se çfarë po ndodh me shqiptarët në Shqipëri“, tha Berisha.