Berisha: Buxheti i 2015, rrënim për shqiptarët. Rrezikohet kthimi i vizave

“Buxheti i viti 2015, çfarë përfitojnë ai apo ajo, familja apo fëmijët e tij? Cilido që bën një analizë do të më jap të drejtë kur e cilësova buxheti i gropës.

E cilësova kështu sepse siç faktojnë zhvillimet e këtij viti ai bëri gropën e ekonomisë shqiptare. Ky buxhet gjigand që u fry duke marrë 1.2 miliardë dollarë borxh e duke rritur 50 % taksat, e nuk u shoqërua me rritjen e rrogave, apo pensioneve. Nuk ka asnjë projekt zhvilimor.  Gjatë këtij viti (2014) nuk u bë asnjë investim.

Nëse shikoni vitin e parë që lamë pas, ngjarjet më të gëzueshme janë dasmat e qeveritarëve. Ishte buxheti i gropës sepse në mënyrën më të pamerituar ekonomia u zhyt në recesion”,tha Berisha.

Gjithashtu Berisha tha se pasojat negative të këtij buxheti mund të çojnë deri në rrezikimin e vendosjes së vizave për shqiptarët.

“Ky buxhet do të sjellë kthimin e vizave. Për fatin tonë më të keq, për shkak të këtyre politikave çnjerëzore, sot janë mijëra shqiptarë që nisen për të gjetur një punë jashtë vendit për kafshatën e gojës, duke shfrytëzuar lëvizjen e lirë”, tha Berisha.

Ndërkohë që e konsideroi situatën ekonomike në vend si atë të mjerimit, Berisha theksoi se papunësia është rritur me 40 %.

“Në 9 muaj investimet e huaja u përgjysmuan. Kanë rënë eksportet, kanë rënë fasonet. Këta bëjnë be çdo ditë për to. Vështorni prapë vitin e gropës, ku janë kursimet e shqiptarëve, 0 rritje.

Cfarë ka tjetër viti i gropës, -1.5% krediti për ekonominë. Rënie e ndjeshme e fuqisë blerëse, e veçanërisht në atë që quhet shportë. Një rritje e papunësisë deri në 40 %. Një rritje e varfërisë shumë e madhe, besohet se është rritur me 33 %. Trefishim i mjerimit. Kjo është tablloja”, tha Berisha.

Në vijim ai pranoi se buxheti i 2015 është më i madhi që ka pasur Shqipëria, por shtoi se në të nuk parashikohet asnjë investim.

“Buxheti është portofoli i dytë i qytetarëve. Pas këtij buxheti grope pritet që arsyeja ekonomike të predominonte, në rreze drite të tejshkonte injorancën e këtij grupi drejtues, që është më analfabet në ekonomi. Ndodh vazhdimi i buxhetit të gropës, buxhet i mjerimit me pasoja të rënda.

Në shifra ky është më i madh se buxheti i vitit 2013, apo 2012 me 1 miliardë. Po nëse me buxhetin e vitit 2012 u ndërta tuneli i elbasanit, u rritën rrogat, pensionet me buxhetin e viti 2015 merret përsipër dhe firmoset shtytja në mjerim e të varfërve”, deklaroi Berisha.

Një nga masat më të rënda që u mor nga Qeveria ndaj qytetarëve, sipas ish-Kryeministrit, është rritja e energjisë.

Ish-Kryeministri Berisha ka shprehur dakordësinë se energjia elektrike duhet paguar në të gjithë, por ai nuk ka rënë dakord me atë që  quan menaxhim i shtetit policor.

“Jemi dhe mbetemi gjithmonë për pagesën e çdo burimi energjie. Por ata që mendojnë se me shtet policor mund të bëjnë menaxhim u duket rrethi katror. Kjo garanton vetëm dështimin. Në vitin 2005 humbjet 49%, zbritëm humbjet duke garantuar edhe furnizimin 24 orë të energjisë.”

“Ne na konkurrojnë për barrë fiskale të gjitha vendet e rajonit. Por për mister rrënimin kjo nuk ka rëndësi, mjafton që fugat e tij shpirtërore të shuhen me shkatërrimet dhe kjo është kënaqësia e tij.

 Qeveria kaloi një vit pa asnjë projekt, dhe do hyjë në një tjetër vit pa asnjë projekt. Sikur qeveria të mos e xhepëzonte buxhetin që po miraton për xhepat e administratës, do të ndërtohej tre herë më tepër.

Por nuk ndodh kështu. Ky është buxheti i shtetit policor. Janë vetëm dy sektorë qendrorë ku janë rritur shpenzimet në mënyrë të papërmbajtur, e këto nuk janë arsimi, shëndetësia apo bujqësia, por shpenzimet e këshillit të Ministrave dhe të Ministrisë së Brendshme”, tha Berisha.

Në lidhje me protestën e 22 Nëntorit dhe ironinë e përdorur nga Kryeministri Rama për këtë protest, Berisha tha se Kreu i Qeverisë jeton në një realitet që nuk ka ekzistuar dhe nuk ekziston.

“Shteti deri para 1 viti kishte problematike, por nuk u pengua kurrë të anëtarësohej në NATO dhe nuk u pengua që merrte dy herë statusin e kandidati, apo arritjen e MSA për heqjen e vizave. Ai jeton një realitet që nuk ka ekzistuar dhe nuk ekziston. Ai edhe për buxhetin thotë se është krenar”, tha Berisha.