Boçi: Ministria e Arsimit po anëtarëson nxënës pa dëshirën e tyre në PS

Deputeti i PD-së Luçiano Boçi i cili drejton dhe departamentin e Arsimit në këtë parti, në vazhdën e denoncimeve ndaj Ministrisë së Arsimit, këtë herë e ka denoncuar publikisht dhe ka akuzuar se po abuzon me anëtarësimet pa dëshirën e studentëve, pranë strukturave të forumit të PS-së. “Drejtoritë Arsimore dhe drejtorët politikë të komanduar, me urdhër të Ministrisë Arsimit, po marrin të gjitha të dhënat e nxënësve të shkollave të mesme të viteve të fundit, të cilët kapin moshën e votimit për herë të parë. Nr karte identiteti dhe nr telefoni, për ti regjistruar në Forumet Partiake të së majtës”, shkruan në facebook Deputeti Boçi.

Këtë rast deputeti Boçi e ka quajtur si një punë përtej çdo normaliteti ligjor dhe jashtë çdo funksioni e roli pedagogjik, që nxënësit, duhet të pranojnë aderimin e tyre në Forumet Partiake të së majtës, kundrejt “përkëdheljes” së siguruar. Edhe me mësuesit ka ndodhur e njëjta gjë, ka thënë më tej Boçi në postimin në facebook. “E njëjta gjë dhe me mësuesit, të cilëve u ofrohet përkundrejt militimit në PS, “rehatia” e vendit të punës”.

Për deputetin Boçi kjo situatë e krijuar ka si përgjegjës të vetëm, Ministrinë e Arsimit e cila sipas tij ka bërë vetëm propagandë që politika nuk do e vriste arsimin, por që po ndodh e kundërta, sipas Boçi, sepse ajo po ndërhynë dhe po e politizon shkollën. PS-ja e ka akuzuar shpesh herë qeverinë e kaluar se ka përdorur nxënës për ti bërë ata pjesë në mitingjet politike, por sipas deputetit të PD-së Boçi se: “Kjo qeveri së bashku me Ministrinë e Arsimit “i fton” të gjithë nga pozicioni i Ministres, i asaj që “i ka në dorë”, t’i bëhen shoqe partie ose shok partie, pasi do “i ndriçohet” e ardhmja?”, ka shtuar më tej në postim në facebook.

R.Sh