“Bomba” e Islamit: Videon e Shukriut e bëri PDIU-ja

“Video e Shukri Xhelilit është bërë nga këta që drejtojnë sot fushatën elektorale të majtë në Dibër. Është bërë nga PDIU dhe kjo ka krijuar një marrëdhënie të tensionuar mes socialistëve, ata që votuan ish­kryebashkiakun Shukri Xhelili dhe këta që sot duan të votohet Muharrem Rama”.

Kështu u shpreh Kastriot Islami, duke analizuar cështjen e zgjedhjeve për Bashkinë e Dibrës në “News24″.

Si ish-­socialist dhe sot në radhët e demokratëve, Islami shprehet se kur analizon çështje politike, mundohet të shkëputet nga bindjet e tij politike dhe të analizojë me ftohtësi atë cfarë ndodh aktualisht.

Sipas Islamit, fushatën e kandidatit të mazhorancës në Dibër po e drejton një i “deleguar” i Ramës që është “përfaqësues” i PDIU, duke krijuar tensione me socialistët.

“Kjo vetëm do të ndikojë në uljen e votave të kandidatit të mazhorancës dhe rritja e votave përmes këtij “mekanizmi acarues” është e pamundur, sidomos në një elektorat inteligjent si ai i Dibrës”, thotë gjithashtu Islami.

Sipas tij, të gjitha këto përplasje brenda PS-së, i shtojnë avantazhet për fitoren e Sherefedin Shehut.

“Perfundimisht mund të thuhet se shanset për Sherefedin Shehun janë shumë të mëdha për fitore”, shton Islami.