Bushati në Paris: Do donim që zgjerimi i BE të ishte më i shpejtë

Ministri i Jashtëm Ditmir Bushati, i cili po merr pjesë në Samitin e Parisit ka vlerësuar vëmendjen që i Bashkimi Europian dhe Franca i kushton vendeve të Ballkanit Perëndimor pavarësisht zhvillimeve të fundit në Union.

Kreu i diplomacisë shqiptare nënvizoi se gjithsesi do të dëshironte që zgjerimi i BE-së të ishte me ritme më të shpejta.

Bushati: Organizimi i Samitit të Ballkanit Perëndimor në Paris për të tretin vit radhazi në kushtet kur Europa po përballet me pasojat e brexit është një lajm i mirë në vetëvete sepse dëshmon që angazhimet e BE përkundrejt vendeve të Ballkanit Perëndimor mbeten të pandryshuara. Ndonëse të gjithë do të dëshironim që politika e zgjerimit të ecte me ritme më të shpejta dhe më cilësore për të përfunduar një orë e më parë proçesin e shtendërtimit dhe shtetkonsolidimit demokratik të vendeve të Europës adriatike apo vendeve të Ballkanit Perëndimor.