Busti i terroristit grek në Shqipëri, PDIU: Shteti shqiptar të reagojë

Partia Drejtësi Integrim dhe Unitet proteston kundër vendosjes dhe nderimit të bustit të Vasil Shahinit në Derviçan të Gjirokastrës duke e cilësuar antishqiptar e organizator të masakrave në Jug të vendit.

Sipas PDIU, krijimi i Bashkive minoritare në kundërshtim me direktivat e BE-së tregon për shkelje sistematike të ligjeve dhe kushtetutës. PDIU i bën thirrje shtetit shqiptar dhe institucioneve të heqin “syzet e errëta” e të hapin fort sytë në mbrojtje të sovranitetit e integritetit territorial, e dinjitetit të shtetit dhe shqiptarëve.

Vasil Shahini konsiderohet si themelues i organizatës territoriste MAVI (Fronti për Çlirimin e Vorio–Epirit). Ky grup terrorist akuzohet dhe për  vrasjen e 2 ushtarakëve shqiptar më 1994, në repartin e Peshkëpisë.

DEKLARATA E PLOTË E PDIU
PDIU proteston me forcë për vendosjen e bustit, e nderimin e anti–shqiptarit, Vasil Shahini, në Derviçan, i njohur nga historia dhe shqiptarët si organizator i masakrave në Jugun e Shqipërisë, themelues dhe drejtues i organizatës terroriste “MAVI”, e krijuar për lirimin e Vorio-Epirit, një term irredentist e pa asnjë bazë historike dhe e paqenë…

Krijimi i Bashkive minoritare në kundërshtim me direktivat e BE-së, pikërisht për të mos u kthyer në enklava të ndasive, por në respekt reciprok e bashkëjetese, po tregon për shkelje sistematike të ligjeve dhe kushtetutës.

PDIU thekson se tashmë janë të përsëritura “betejat” për tabelat që duhet të shkruhen në dy gjuhë, e në krye në gjuhën Shqipe, tensionet në varrezat e Bularatit, apo rasti i Kacifasit, që për shkak të lëshimeve dhe vendosjes së “syzeve te errta” të institucioneve të Shtetit Shqiptar, po cënojë dhe integritetin territorial dhe bashkëegzistencën ndër etnike .

I bëjmë thirrje Qeverisë Shqiptare, organeve ligj zbatuese, SHISH, Ministrisë së Brendshme, Prokurorisë së Përgjithshme, e mbi të gjitha Kryeministrit, që të heqin “syzet e errëta” e të hapin fort sytë në mbrojtje të sovranitetit e integritetit territorial, e dinjitetit të shtetit dhe shqiptarëve.

Të hapë sytë fort “pa syze të errta”, për të parë e kuptuar që shkelja sistematike e Kushtetutës e ligjeve, mbajtja në këmbë e Ligjit të Luftës nga Greqia, ngritja e varrezave të ushtareve grekë, të ardhur si pushtues e që po mbjellin tokën shqiptare në kufijtë imagjinarë të Vorio-Epirit, (kur shumë mirë mund t’u ktheheshin familjareve), heshtja për të drejtat e shqiptarëve të Çamërisë, e diskutimi me palën greke për heqjen e emrit Çamëri nga tekstet e historisë së Shqipërisë, lëshimet e rrezikshme e të pa kuptimta në procesin e “CENSUSIT 2020” janë këmbana alarmi, e do të na kushtojnë shumë kur të shpërndahet e të na dalë “Tymi i Hashashit” si shqiptarë.