Caka: LSI nuk bën blerje, përfshirja e të rinjve në politikë nuk është eksperiment

Ish-deputetja e LSI-së, Silva Caka ka folur më shumë për vizionin e LSI në zgjedhje, si dhe për largimet nga kjo forcë politike. Sipas saj, LSI-ja e ka shumë të qartë misionin e saj të bazuar te rinia, gruaja dhe Integrimi Europian.

”LSI nuk bën blerje. Edhe vetë fakti që një parti politike është në opozitë dhe jo në pushtet, është e qartë që nuk ka blerje por vetëm afrim mendimesh dhe ideologjish të caktuara ose për afrim të interesave që njerëz të caktuar e shikojnë si madhor dhe si prioritar. Misioni i LSI ka qenë shumë i qartë. Rinia ka qenë një nga fokuset kryesore, trajtimi i gruas me më shumë dinjitet, me më shumë përfshirje politike njëkohësisht. Gjithashtu të mos harrojmë edhe integrimin evropian. Pra këto tre shtylla janë baza e LSI. Sigurisht që ka një program se si do të realizohen këto, besoj që ditë pas dite e kemi shfaqur dhe alternativat që ne ofrojmë për rikthimin e të rinjve në Shqipëri ose qëndrimin e atyre që ende janë në Shqipëri. Për afrimin e gruas dhe vendosjen e saj në një status tjetër social, politik dhe ekonomik. Integrimi evropian është ajo që ne na intereson më tepër dhe që kërkon disa veprime të ndërmarra dhe të ndërlidhura me njëra-tjetrën, që t’i japësh shansin Shqipërisë që të kenë një datë për çeljen e negociatave”,-tha Caka për ”Ora News”.

Nga ana tjetër, e pyetur për largimin e ish-ministrit Nasip Naço nga LSI-ja, ish-deputetja nuk ka preferuar të flasë shumë, teksa ka shtuar se arsyeja e distancimit të tij kanë qenë çështje personale. ”Kjo shprehje nuk ka lidhje me LSI, sepse jemi mision në vetvete dhe jo eksperiment politik. Unë nuk kam ndërmend të komentoj dhe gjykoj arsyet personale dhe subjektive, sepse në dijeninë time nuk ka asnjë arsye objektive për rastin konkret (Nasip Naço). LSI është një realitet politik dhe nëse ne do ta quajmë përfshirjen e më shumë të rinjve në politikë si një eksperiment do të ishte një turp për të gjithë ata që kanë dhënë një kontribut apo kanë aderuar në LSI prej vitesh, apo që kanë mbajtur edhe pozicione të larta”.