Celibashi mesazh kandidatëve të listave të hapura: Kemi kamera, nuk lejojmë “trafikimin” e votave

Kreu i Komisionit Qendror të Zgjedhjeve, Ilirjan Celibashi, ka publikuar një mesazh për kandidatët në listat e hapura. Në një postim në rrjetet sociale, Celibashi tha se KQZ ka marrë të gjitha masat për të garantuar integritetin e këtij procesi dhe për të parandaluar çdo tentativë për manipulim apo “trafikim” të votave.

“Nisur nga disa shqetësime për integritetin e numërimit dhe vlerësimit të votave parapëlqyese, siguroj që KQZ ka marrë të gjitha masat organizative, njerëzore dhe ato teknike për të mos lejuar ‘trafikimin’ e votave për kandidatët e ‘listës së hapur’ të çdo subjekti.
KQZ ka regjistruar dhe ka pamjet filmike të procesit të numërimit dhe të vlerësimit të votave për partitë politike dhe koalicionet.
Nëse në procesin e numërimit dhe vlerësimit të votave për kandidatët në ‘listën e hapur’ do të konstatohen mospërputhje tek çfarë rezulton në pamjet filmike me atë çfarë do të rezultojë në procesin e vlerësimit të votave për kandidatin, atëherë numëruesit apo komisionerët përgjegjës për këtë rast do të përgjigjen penalisht për shkeljen e rëndë të integritetit zgjedhor”, shkruan Celibashi në një postim në rrjetet sociale.