Demokratët po punësohen në administratë, Spahiu: Më i moralshëm se pranimi i mandateve nga deputetët

Juristi Kreshnik Spahiu komenton strategjinë e kryeministrit Edi Rama që po punëson në administratë përfaqësues të PD-së dhe opozitës pas zgjedhjeve të 11 majit. Ai e cilësoi një strategji për të përçarë edhe më shumë opozitën, por nga ana tjetër theksoi se punësimi i demokratëve në administratë është më i moralshëm sesa pranimi i mandateve nga deputetët e PD-së.

‘”Edhe kryetari i PD-së së Vlorës nuk mund të presë 36 vite në opozitë, sa të vijë PD në pushtet. Do punësohet. Që ka strategji nga PS që po i punëson ata, sepse po rekruton në administratë të gjithë njerëzit me influencë të PD-së, duke u ofruar punë dhe ngjallur xhelozi apo nxitur përplasje brenda PD”,-tha në Report TV.

Po ashtu ndau mendimin se ky është një cikël i mbyllur për opozitën, e cila aktualisht kontrollohet nga kryeministri Rama. ”PS erdhi me dualitet në qeveri dhe tani e ka timonin e vetëm. Mungesa e pushtetit të bën që opozita të konsumohet dhe të humbasi rrugës. Mendoj se ky është një cikël i mbyllur. Edhe liderët e PD-së mendoj dhe jam i bindur se janë të kontrolluar nga pushteti i Edi Ramës”.

Informacione të besueshme tregojnë se shumë drejtues vendorë të PD po kërkojnë punë në administratën e drejtuar nga Rama.

Opozita është në ditën e saj më të zezë dhe duket se po shkon drejt zhbërjes.