Deputeti socialist hedh akuza për bashkinë që drejton PS-ja: Në Fier protagonistë të drogës po fitojnë tendera

Në një kohë që SPAK ka nxjerrë prangat dhe në aksionin e saj kanë rënë kryebashkiakë dhe zv/ministra, deputeti i zgjedhur i PS-së, Petro Koçi i bën thirrje këtij institucioni që të kalojë dhe nga Fieri, pasi sipas tij krimi po fiton tendera publikë. Ai shkon edhe më tej me deklaratën e bujshme, duke thënë se duart e krimit janë shtrirë mbi financat publike duke përmendur edhe skemën që përdorin. Bashkia e Fierit drejtohet pikërisht nga socialistët.

“Efektet e SPAK dhe të Reformës në Drejtësi po japin rezultat. Bota e krimit dhe te korruptuarit kanë filluar të ndjejnë frikë nga ligji. Këto efekte i mirëpresim edhe në Fier ku duart e krimit janë shtrirë mbi financat publike. Protagoniste të trafikut të drogës dhe të dhunës tashmë kanë legalizuar subjekte biznesi që fitojnë tendera publike.

Këtë e realizojnë ose nëpërmjet lidhjeve të drejtpërdrejta me ndonjë titullar institucionesh ose nëpërmjet kërcënimit të zyrtareve të caktuar që ekzekutojnë prokurimet si edhe nëpërmjet eliminimit të konkurrenteve në procesin e tenderimit duke kërcënuar pronarët e subjekteve të biznesit.

Të fuqizuar sidomos duke lare paratë e pista në industrinë e ndërtimit ata vazhdojnë të përvetësojnë fitime kolosale nga taksat tona. Organet ligjzbatuese nuk duhet të lejojnë që qyteti ynë t’i nënshtrohet botës së krimit të organizuar”, thotë Koçi.